ایک عرصے سےاردو کی نوک وپلک سنوار رہا ہے مینائیہ کا مشاعرہ بسنت :ڈاکٹر لائق علی خاں

گونڈہ:بابا حضور محبوب العلماء والمشائخ حضرت الحاج محبوب مینا شاہ علیہ الرحمة الرضوان ہمارے دور کے ایک ایسے عظیم عبقری شخصیت تھے جنہوں نے ایک طرف جہاں جامعہ امیرالعلوم مینائیہ قائم کرکے مسلک اعلی حضرت کی تبلیغ کا شاندار منبع تیار کیا تو وہیں ہندوستان بھر میں سب سے پسماندہ ضلع میں شمار ہونے والے گونڈہ ضلع میں سب سے پہلے مینا شاہ انسٹی ٹیوٹ آف ٹیکنالوجی قائم کرکے 21 ویں صدی کے نوجوانوں کو اپنا مستقبل روشن کرنے کا ایک نیا باب کھول دیا وہ یہیں نہیں رکے بلکہ بدلتے حالات کو سمجھتے ہوئے اردو زبان وادب کے تحفظ اور اردو شاعری کی نوک وپلک سنوارنے کے مقصد سے تقریبانصف صدی قبل طوطئی ہند سیدنا حضرت امیر خسرو علیہ الرحمہ کی یاد میں اپنے پیر ومرشد سیدنا مخدوم اکرام مینا شاہ علیہ الرحمہ کی موجودگی میں بسنت کے موقع پر جومشاعرہ بسنت کی داغل بیل ڈالی وہ آج تک مسلسل جاری ہے بلکہ اب ان کے صاحب سجادہ کی سرپرستی میں مزید توانائی کے ساتھ یہ مشاعرہ اردو شاعری کو مستحکم کرنے کا کام کررہا ہے ۔یہ باتیں اتوار کی شب بسنت کے موقع پر مشہور خانقاہ دربار عالیہ مینائیہ میں منعقد کل ہند مشاعرہ نعت ومنقبت میں خطبہ صدارت پیش کرتے ہوئے ڈاکٹر لائق علی خاں نے کہیں ۔

انھوں نے کہا کہ گونڈہ کی سرزمین ادبی لحاظ سے کئی معنوں میں بہت زرخیزثابت ہوئی ہے یہاں حضرت اصغر گونڈوی جیسے عظیم شاعر نے پرورش پائی ہے تو رئیس المتغزلین جگر مرادآبادی کو بھی یہیں سے شاعری کی دنیا میں عروج حاصل ہوئی ۔یہاں کے کئی غیر مسلم شعراء نے بھی نعت ومنقبت میں بہترین نذرانہ عقیدت پیش کئے ہیں ۔ نعتیہ شاعری جو اردو کا ایک سب سے اہم سرمایا ہے اس کی شروعات خانقاہوں سے ہی ہوئی ہے اور آج بھی خانقاہوں سے اس صنف سخن کو فروغ مل رہی ہے۔انھوں نے یہ بھی کہاکہ آج اردو زبان وادب کا مسئلہ کسی سے بھی ڈھکا چھپا نہیں ہے اگر ہماری خانقاہیں اور مدارس اسلامیہ کو چھوڑدیا جائےتو اردو لکھنے اور پڑھنے والے چراغوں سے ڈھونڈنے پر شاید ملیں گے یہی محبوب العلماء کی دوراندیشی تھی ۔